Our Story
Chin minphuin athunglu te ungnaw Indianapolis hyn; USA Chin khawlupi cite la nynh paw thuazah, tu e-khua kya tuh Zotung minphuin nyn mah 2007 kya te khawsah thokhae a la thua bua. Zotung milu kae la zya kiaccuze pungkunaw hoi kho la thua la khyh. A ccynh dydy liazah 2009 kya vaetetuh Zotung miphuin milu 17 lae nynh Indianapolis kya khua kae la sah bua vae. 2009 kum, Zotung lalyh te Christmas tua ku la thuazah; Christmas tua kunaw pungkunaw kyate, piccahae lungthin kya naw kheh vae kheh pungku rynaw thinlung yn pou. Christmas zerya ma kyngte meeting tuaku la thuazah, naw kheh vae kheh pungkunaw hoi la cite kalang te nawccawnaw rae ah la thua. 26 December, 2009 kya fellowship pungkunaw vae khehnaw tuh Paaw Bawi Ma -inn kya hoi a la thua. Pungku tha te, meeting hoi la thuazah, kalang nawccawnaw te, naw kheh vae kheh pungkunaw tuh, “INDIANA ZOTUNG CHRISTIAN FELLOWSHIP(IZCF)”, cite min min bin la thua.
Bawipaw thawccinaw liate, Fellowship kae thadyngnawte kum nin yn civaetetuh Indianapolis Zotung minphuin milu 35 kae la ci bua vae. Fellowship pukunaw kya kae sawsanaw tuh milu pung thungnaw lang te ZCC Krihccawbuu thadyng kho buanaw lang nynh la thua. Tamawtuh minphuin ccanglang pungku bua la thua zah, bya thae khyh kiaccuze mawte krihccawbuu thadyng khae rynaw lungthin yn pou. October 02, 2011 - ZCC thadyng kae lang vae cite meeting tua ku la thua zah, Bawipaw nynh kae paccyngkunaw sawsanaw ccing sah te November 06, 2011 kya Rev. Kaw Kung nynh sawsanaw te Zotung Christian Church – Indiana tuh thadyng khae a la thua. Zotung Christian Church – Indiana krihccawbuu nynh kae sawsanaw yng ccingsah tu Pachia min kae thehooy sah. ZCC-Indiana yng hungpatu Rev. Kaw Kung tungvaw ZCC- Indiana krihccawbuu nynh lungtuanaw a le pi kae hoi. Khrihccawbuu phuinpoi kya thawzung yn pyatuhae: ZCC-DC, ZCC-GA te ZCC-KS hae tungvaw zemah lungtuanaw a lepi kae hoi.
ZCC-Indiana krihccawbuu nynh a paccyngkunaw tuh, a zobyate a zo hlawte Pachia thehoi sahte, A penaw te A ra halang ryalawnaw kya; Pachia peenaw te a dingnaw kha masaty ccung nynh thua.