Balamaw
A vaeram ukkunaw a hoi khyh kiaccuze, Zotung minphuin aba nyh khuaram, innloo, zuavaeccaw cciataw te, ram thungnaw lang a thua oh. A lungfua tuh Malaysia te India lang sosoh khawsah te a la rya ku oh. Zotung minphuin tuh, a hiinpaw Pachia a beih ohpaw tuazah, sosoh ungnaw khua ram kya mah, beihnaw buu(fellowship) thadyng khae a la thua he. Sosoh a ungnaw oh khua rya kyate vawsaw lungriathae te Bawipaw a konaw oh tuh, Bawipaw nynh thaepya te Zotung minphuin nyh zemah USA khua ram kya, khuasah kho buanaw ccyhhoi yn pya. Bawipaw thawccianaw lia te nyh a thua.
ZCC-IN kyate la thua tyngpaw
Paw Khan Tun – July 11, 2007
Innbyng langte
Paaw Khaw Tin – Jan 21, 2009
Indianapolis Laelung Sytyng Paw
Bawipaw thawccinaw liate, USA ram kya Chin ccungccaw lungfuaccenaw Indianapolis khua kya mah, Zotung minphuin nyh kum 2007 te laelung la sy bua a thua. ZCC-IN innbyng lungkhu kya, Indianapolis khua laelung a la sy tyngpaw tuh Paw Khan Tun (Thawlang) thuazah 11 July, 2007 kya a la thua bua vae. Innbyng langte a hmasaty a la thua tyngpaw tuh Paaw Khaw Tin (Langly) thuazah, 21 January 2009 kya Indianapolis khua kya innbyng te a la thua hae.
Pungkunaw Hmasaty Thonaw
2009 kum laelehhaw kya tuh, Indianapolis khua kya Zotung minphuin a thua paw balyng te milu 9 lae la cih ku vae. Thua takaw, ryahae maw thuazah zete lang volleyball bia te lazoi he a thua. 2009 July naw khehnaw kyate naw kheh vae kheh innbyng sawsang pungkunaw la rae thua zah, sanin lehkaw ccia khaeku te seleh pia kho la thua khyh.
INDIANA ZOTUNG CHRISTIAN FELLOWSHIP (IZCF) THADYNGNAW
2009 kum thang dyng kya Zotung minphuin Indianapolis khua kya thua paw tuh milu 11 lae la cih ku vae. Tu e-kum Kristmas tuh, Indianapolis khua kya Zotung minphuin ungpaw lalyh te $20 khoi ku te Kristmas poi la tua ku a thua. Krismas nin sawsang pungkunaw tuh, myarya lungpaw ung lang te ccyh ma a la thua. Pungku tha te, Krismas zerya tuh pawkaleh te kae la ma kheh.
1/2/2010 – IZCF thadyng a la thua.
IZCF Picca hmasaty hae
Chairman: Paaw Khaw Tin
Secretary: Paaw Aung Ling
Treasurer: Paw Khin Maung Aye
2009 Krismas: - E-Krismas poi pungkunaw kya te Pachia nynh; naw kheh vae kheh innbyng sawsang pungkunaw; bua raethui rynaw kae lungthin kya yn hoi sah. Kristmas zerya ma kyngte, meeting tuaku te nawkheh vae kheh innbyng sawsang pungkunaw tuh bua raethui thuasah cite, kae la ho. A awkhua langpaw vae Nintaruhnin zete kyate, nawkheh vae kheh innbyng sawsang pungkunaw tuh Paaw Khaw Tin inn kya te kae la tho khae.
January 2, 2010: - A vaeninnaw pungkunaw tuh Paaw Bawi Ma inn thuazah, pungku a tha te meeting tua ku te, kalang nawccawnaw te nawkheh vae kheh innbyng sawsang pungkunaw lang hoipaw tuh, "Indiana Zotung Christian Fellowship" (IZCF) cite min kae la phu ku. IZCF picca lu 3 mah palou po ku la thua. E-fellowship thadyng khaenaw nynh a la e-paw tuh, Indianapolis khua kya Zotung minphuin pungthung bua sah, Zotung balyng nyh lungngin ku te buu laesahkunaw hoi lite Kriccawbuu thadyng khae khonaw lang sawsang te thuasah, sisua te thuasah thawzung thuatyng a la tua.
ZOTUNG CHRISTIAN CHURCH – IN (ZCC-IN) THADYNGNAW
Bawipaw thawccinaw lia te Indianapolis khua kya mah Zotung minphuin dadya la pung thung zah, a la thua tyng hae paw nyh la pungkunaw Indiana Chin Baptist Church (ICBC) kya a lungfua tuh member pya ku a la tua. Bya thae khyh kiaccuze, pungku lang thaw yn zya vae. Zotung minphuin Indianapolis kya khuasahpaw bya thae khyh kiaccuze nawpinin lang beikinn kalang a thua paw yn zya. Zotung minphuin kae la zya zemah Bawipaw nyh tyty yn la ccia khae. Fellowship te thadyng nua thepaw, naw kheh vae kheh innbyng sawsang pungkunaw kya, mitphi te sawsangnaw tuh, Bawipaw nynh aphi yn pya mamin cih, cite zyngnaw tyngkarin kae hoi. August 31, 2010 kum ZCC-DC Kriccawbu kalangte, Rev. Kaw Kung te Kriccaw Picca’ae nynh pungkhaeku te sawsangnaw ccyh yn ma khae hae zah, Kriccawbu te thadyng khonaw lang thawzung yn la pya hae. Thawzung myarya kae lah law kuh.
ZCC-IN KRICCAW PICCA HMASATY HAE
Van Peng - Chairman
Ro Tung - Vice. Chairman
Khin Maung Aye - Secretary
Aung Ling - Asst. Secretary
Khaw Tin - Treasurer
Ngun Za Ma - Asst. Treasurer
Aw Yah - Member
Meeting Tuakunaw: - Accyh dyadya yn lia, Indianapolis khua kya Zotung minphuin pungthungnaw Bawipaw nynh hythuanaw yn pya. 2011 kum thanaw lang vae tuh, kae balyng te milu 35 lae kae la cih bua vae. Oct 02, 2011 nawnpinin pungku a tha te, Paaw Van Peng inn kya, Kriccawbu thadyng khaenaw kung langte meeting kae la hoi. Meeting kae paw milu 25 kae la cih kho. Kae kalang nawccawnaw te Nov 6, 2011 kya, ZOTUNG CHRISTIAN CHURCH-INDIANA (ZCC-IN) cite thadyng bua langvae cite lungtua lungpaw te bya paenaw kae la hoi. Phuinpoi tuanaw lang cite, ryahaepaw nynh, $100, $200, a ba nawkheh lakhah cia hlu te, thawmuin te ZCC-IN thadyngkhaenaw poi halang $4710 ahlu kae la pou sah.
Kriccawbu thadyng khae lang cite paccyngkunaw kya a phuinphuin te Seta tounaw, runaw kae tungpaw muih kho lang ung. Aba kae ryahae la tha zah, a ba mawtaw eciden kae la tung. Thuasahlamah, Bawipaw tuh a ccaw’ae halang a hoi fua lang te khua zungzae khaintu Pachia a thuanaw khah, ZCC IN Kriccawbu a thadyng cipaw zyngtu hae kya yn la sah pya ku.
ZCC-IN Hungnaw: - Aninsaw yn ccin vae, IZCF te nawkheh vae kheh innbyng sawsang pungkunaw kya, kae sawsangnaw tuh, Bawipaw nynh yn ccinsah vae. November 06, 2011; ZCC-DC, ZCC-GA te ZCC-KS kriccawbu’ae sawsang lungtua khaenaw te, Rev. Kaw Kung nyh ‘ZOTUNG CHRISTIAN CHURCH - INDIANA’ (ZCC-IN) kriccawbu tuh ZCCUSA kriccawbu bu 4-naw lang, North America Matu Christian Church –beikinn kya sawsangnaw te yn hungpya vae. Pungkunaw ccyh kae ma kyngte, zerya ze mah pawkaleh te kae la ma kheh. ZCC-IN kriccawbu innbyng hae nynh Kriccawbu cia thadyng kho langte hythuanaw yn pyatu Bawipaw kya kae lungtua zah, A min kae thehooysah.
NOPIBU; MINO TE SUNDAY SCHOOL Department hae thadyngnaw
Bawipaw nyh a hythuanaw te yn ccia khae zah, member mah ryry kae pung thung. 2013 kya vae te tuh, kriccawbu rya lawnaw kya department ccin lang te thadyng kho bua yn thua vae. March 10, 2013 Nopi nin pungkungnaw kya, Kriccawbu kya rya latu lang po thaw paw hae, Kriccawbu Picca, Nopibu Picca te Mino Picca hae tuh Rev. Kaw Kung sawsang hythua ngia pyanaw te ryalahtu lang tawin pya a la thua vae hae.
ZCC-IN NOPIBU PICCA HMASATY HAE:
Ne Paw - Chairman
Khin San Win - Secretary
Jubilee - Treasurer
Medina - Member
Hle Hle Oo - Member
San San Aye - Member
ZCC-IN MINO PICCA HMASATY HAE:
Hoi Uk - Chairman
Thawng Bawi - Secretary
Sing Aung - Treasurer
Cung Bik Tha - Member
Kyaw Soe - Member
Pachia Hythuanaw
Beikinn: - ZCC-IN Kriccawbu Bawipaw nynh hythua yn pya. Kum 2017 kya vae tuh Bawipaw cciakhaenaw liate member mah 200 lae kae la cih bua vae. 2014 kum te, kum 5 paccyngkunaw te beikinn halang fund rising tuapaw la tho khae thua zah. Bawipaw nyh a lae langte hythuanaw te yn cciakhae. March 15, 2017 kya Bawipaw nyh Beikinn reku khonaw hythuanaw yn pya. Bawipaw min kae thehooy sah.
Civoipi: - Tu-e kyalya thua li te, ZCC IN kriccawbu nyh a lia vae paw kum 2-3 kya; ma lang te mah kae la sah kho li paw, USA ungpaw Zotung miphuin nyh ngaehoi fuaccepaw a vae 8-naw ZCCUSA Civoipi September 1-3, 2017 Indianapolis khua kya law kho bua a la thua. Tyngre Bawipaw lia te nynh a thua. Bawipaw nyh phuenaw ccou vae sah.
Athanawbya
ZCC-IN tuh, Bawipaw nyh hythua pya paw kriccawbu thua zungzae sah lah. A penaw te ram halang phyanaw thathyh te rya law kho bua hynh kae saduhthawkupaw te kae sawsangnaw a thua. Kriccawbu kya Bawipaw phuenaw kou a lang ku khonaw lang, lukheh te lukheh sungsahkunaw te lungngin te rya kae law thyanaw lang, Bawipaw nyh tyty yn la cciakhae vae sah. Phuenaw miakaw tuh Bawipaw kya la ung zungzae vae sah.
SYNGTAW KU LANG PAW’EA
2010, 02 Jan – IZCF Thadyngnaw
2011, 06 Nov – ZCC IN Thadyngnaw
2013, 10 Mar - Ahmasaty Nopibu Picca te Mino Picca sawsang pyanaw
2017, 15 Mar - ZCC IN Beikinn re nin
2017, 1-3 Sept - Vae 8-naw ZCCUSA Civoipi, Indianapolis
Σχόλια